ഉറക്കഗുളികകള്ക്കൊടുവില്
രാത്രികളില് മരിച്ചുവീഴുന്ന
സ്വപ്നങ്ങളുടെ കരച്ചിലില്,
ഉറങ്ങുന്ന ആത്മാവിനെ
പുണര്ന്നു, തോളിലേറ്റിയാരോ
നടക്കുമ്പോള്, പുറകില്
ആര്ത്തനാദങ്ങള് വീണുടയുന്നു;
രാമായണപാരായണം ഇടറുന്നു,
ചന്ദനത്തടികള് വരവേല്ക്കുന്നു!
നിലവിളക്കില് മരണം കാത്ത്
സ്വയം എരിയുന്ന അഗ്നിക്ക്
കൂട്ടായി, പ്രാണന്റെ പുകച്ചിലില്
മരണമൊരറിയിപ്പാക്കി
ചന്ദനത്തിരികളുടെ ഗന്ധം!
ശാന്തയായി കിടക്കവേ വെറുതെ
ചിരിച്ചു- മരിച്ചത് ഞാനെങ്കില്,
കിടക്ക തയാറാക്കിയ ചന്ദനവും
ബലാല്ക്കാരം ചെയ്യുന്ന അഗ്നിയും
സുഷുപ്തിയില് ജനിക്കുന്ന സ്വപ്നവും
എന്റെ മരണത്തില് മരണമടയും!!!
No comments:
Post a Comment